17 مراجعة لـ كورسات اونلاين: “كيف نجهز المنزل\الصف لاطفالنا (ب 30 يوم)؟”

1. 

   تم التقييم 5 من 5

   نور – أبريل 2, 2020

   سجلت للمساق لأني كنت متعطشة لتغيير جذري بنمط حياتنا ولأني بدي بناتي يكونوا مستقلات، مبادرات، قائدات وآفاقهن واسعة.
   هون اجى دور ميجي وجونا بإرشادهن ومرافقتهن النا بصورة مهنية عالية جدًا. اعطونا كل الآليات والتقنيات لحتى نعمل هذا التغيير.
   الكورس مثري جدًا وغني بالمعلومات القيمة. بنصح كل حدا حابب يعمل التغيير اللي احنا عملناه ينضم ويستفيد مثل ما احنا استفدنا.
   شكرًا ميجي
   شكرًا جونا ❤

2. 

   تم التقييم 5 من 5

   Mozayan Abed Alhaleem Khutaba (مالك موثوق) – أبريل 3, 2020

   سجلت للمساق كوني تابعت طرق مونتيسورية عديدة وكنت متطلعة على المنهج بس المعلومات تكدست براسي وما عدت اعرف اطبقها بالشكل السليم والسبب المعلومات من عدة مواقع من عدة اشخاص كل حدا بيطبق بمفهومه وبشو بناسبه كنت مرهقة من كمية المعلومات وقلة الكيف والجودة والخطة الملائمة لشخصي لعائلتي ولمقدرتي …كنت محتاجة شخص مهني اشارك معاه اسئلتي تخبطاتي افهم وين هفواتي وهون شفت المساق وجذبني العنوان وحسيت انه
   المفتاح هو تجهيز البيئة كونه احد اهدافي الكبار هو بناء طفل مستقل لديه بيئة مناسبه واساعده ليطور نفسه واشجع فضوله وهاي النقطة كانت جدا صعب تنفيذها عندي كيف اشجع فضوله قدر المستطاع واكون قدوته في التعلم بالشكل الصح حسب المنهج.
   المساق اعطاني الادوات الكافيه العلمية والمهنية لاحقق هدفي بتوفير بيئة امنة تغيير في سلوكياتي والعديد العديد من الامور ممكن اكتب عنها كثير.
   بسمح لحالي اقول وفخورة بنفسي اني اهديت حالي المساق بدون تردد المساق فاق توقعاتي من ناحية المضامين وسهولة تطبيقها السلاسة بالوحدات وترتيبها
   التجاوب السريع والاجابات الكاملة والشاملة مع امثلة من الحياة الواقعية من قلب بيوت الرائعات ميجي وجونا مشاركتهم النا بتفاصيل حياتهم كأمثلة واقعية ومحفزة لنا للبدء بالتغيير من اليوم الاول ومع هيك اعطاء مساحات لنا واثراءنا ايضا بمواقع وروابط جدا مهمة وعملية لكل بيت .. بعرفش قديش ممكن اكتب بس لاوفي حقهن بهيك مساق .. المساق جدا جدا رخيص نسبيا للمحتوى .. شكر من الاعماق بنصح بشدة التسجيل للفوج الثاني ودعوة اصدقائكم للمساق الرائع الغني ..

3. 

   تم التقييم 5 من 5

   Luma Tamimi (مالك موثوق) – أبريل 3, 2020

   الكورس اكثر من رائع ووجدت فيه توقعاتي وأكثر
   استمتعت فيه كتير ولقيت فيه الفائده العظيمه لاطفالي ونمط حياتهم وحتى أثر على نظامي بالمنزل
   بشكر ميجي وجونا كتير القريبين من القلب و اللي دعموني واهتموا كتير وشجعوني لصنع التغيير ببيتي للأفضل وبتمنالهم كل التوفيق بالكورس الممتع والغني بالمعلومات الرائعه والمميزة والمعروضه بصورة مميزة وممتعه ومرتبه ومهنيه عاليه اللي بتتمني لو مايخلص بالمرة ويبقى معنا طول الوقت
   كل الاحترام ويعطيكم الف عافيه

4. 

   تم التقييم 5 من 5

   عبير زنانيري – أبريل 4, 2020

   الكورس كثير مفيد، انا قبل ماانضم للمجموعة كنت مبلشة اقرأ واغير بالبيئة بس الكورس اضفلي معلومات كثير ما كنت اعرفها وسهل علي شغلات كثيرة. .. . . غير انو فتحلي عيوني على اشياء صغيرة ما بتخطر بالبال ! اي نعم القعدة بالبيت صعبت علينا النواقص للبيئة بس في كثير اشياء بتقدرو تعملوها من الموجود! بنصحكم تسجلو خصوصاً بهالوقت لأنو في مجال تقرأو وتستغلو الوقت وانتو قاعدين بالبيت! انا حبيت الكورس وساعدني اغير كثير شغلات ، انتو كمان سجلو عشان تقدرو تغيرو ❣❣

5. 

   تم التقييم 5 من 5

   Sahartarboush263@gmail.com – يونيو 4, 2020

   كورس شامل ومتكامل, أكثر من رائع, اخذت كثير ادوات وتقنيّات تساعدني اني احصل على بيئة جدا داعمة لتطوّر ابني في كافة المجالات 🙂
   حبيت انه اعطاني كمان معلومات وارشادات كيف اكمّل بس يكبر ابني 🙂 حسيت المرافقة شخصية جونا وميجي دعموني كثير واعطوا من قلبهن, بنصح كل ام واب بالكورس لانه عنجد قيّم

6. 

   تم التقييم 5 من 5

   Noor.fuqaha@hotmail.com – يونيو 23, 2020

   الكورس جميل جدا و مفيد.
   تقسيمكم للمواد و اختياركم إلها مدروس بشكل جيد و مناسب لإحتياجات الأهالي بإختلاف أعمار أطفالهم. فخورة و سعيدة فيكم كرياديات فلسطينيات. بحكي عنكم و عن تجربتكم لكل الأمهات إلي حولي. ممكن ملاحظة وحدة للتطوير و هي طريقة عرض صور التغييرات و تعليقكم عليها. تحت كل منشور بنلاقي مجموعة صور و مجموعة نصائح مفيدة و مرات بتدخل المواضيع ببعض و مرات احنا كمشتركات بنستعجل و بننزل صورة ممكن تكون أنسب لمنشور تاني. إذا قرأنا معلومة مفيدة وما سجلناها في نفس اللحظة بنضطر ندور في أكتر من مكان لنلاقيها في التعليقات. صور القبل و البعد كوحدة منفصلة فكرة حلوة لحل المشكلة لكن نصائحكم المفيدة رح تكون موزعة في أكتر من تعليق و مخفية في التعليقات. هل ممكن نخلي التجارب كلها و التعليقات لآخر وحدة مثلا؟كيف ممكن نصائحكم للتطوير تكون ظاهرة أكتر و نسهل الوصول إلها؟

7. 

   تم التقييم 5 من 5

   ريم وهبة (مالك موثوق) – أكتوبر 24, 2020

   بنصح كثير بالكورس لكل عائلة بتحب تدعم تطور أطفالها يحققوا أقصى قدراتهم.
   هذا الكورس مش رح ييجي يقولكم كيف لازم ترتبوا رفوف الألعاب ببيتكم انما رح يقدملكم الادوات، الميزات والفترات الحساسة الي بحسبهم انتوا تلائموا البيئة لأطفالهم بحسب معاييركم واهتماماتهم كعائلة.
   كل هذا رح يساعد أطفالكم يكبروا ببيئة بتحترم شخصيتهم وبتطور استقلاليتهم.

   ميجي وجونا بقدموا أسس منهج مونتيسوري بطريقة مهنية وممتعة، مع فيديوهات واضحة وحقيقية ضمن مجموعة فيها كان سهل نشارك أفكارنا وأراءنا وكان كثير مريح نحكي وندردش عن كثير شغلات الي هي بكثير اكبر من انه بس ترتيب رفوف.

   واحلى اشي انه كل مضامين الكورس بلغتنا العربيه وملائمة لبيئتنا 🙂

8. 

   تم التقييم 5 من 5

   مرام قبلاوي عايدي (مالك موثوق) – نوفمبر 8, 2020

   دفتري صار ملياااااان ملياااااان حِكم وأقوال مش أقل من عبقرية، الي مرقتها بكورس “تجهيز البيئة حسب مونتيسوري” الي تمرر على يد الرائعتين: ميچي وجونا.
   ليش من اسا أخدته وبعد فش عندي ولاد؟ لإنه بآمن إنه ولا مرة بكير نعرف كمان وكمان بطريق التحسن، وشوي شوي منخلق مجتمع مفتوح الآفاق ومنكون دايمًا بتطور مستمر.
   ضيفوا على هيك، إنه السعر كتير كتير منخفض نسبةً لكثافة المعلمومات والمرافقة الشخصية والإهتمام. لدرجة إنك بتحسي وكأنه الكوري شخصي إلك! بنصح كل شخص يمرق التجربة لإنها بنّائة وبتفتح عالم بأكمله، رائع ومثير. ميچي وجونا كتير لطيفات وما بحلوا عن الواحد إلاّ ما يتأكدوا انه اخد جوابه ووصل للنتيجة المرغوب فيها، وهاد جدًا جدًا مش مفهوم ضمنًا!! بوركتن وشكرًا لجهدكن بتطوير الأجيال الصاعدة!

9. 

   تم التقييم 5 من 5

   رلى جبران – يناير 13, 2021

   سجلت للكورس من بعد ما ولدت بنتي الثانية ( مي) وصرنا عائلة مع ولدين بفترة الحجر الاولى بعز وباء الكورونا. الولدين بالبيت ( جود سنتين وتمانية اشهر وقتها، ومي ٣ أشهر). كنت بحاجه اعمل ترتيب براسي وبالبيئة بالبيت عشان اقدر اسيطر عالأمور وأعطي كل ولد حقه. هدفي الأساسي كان تعزيز وتقوية الاستقلالية عند ابني الكبير عشان بطبيعة الحال كنت اقل فاضية اله مع طفلة جديدة . حسيت بحاجه أكبر لزاوية العاب وشغل مرتبة وجذابة. وبيئة التي تدعم استقلالية جود بما يتعلق بأمور الحمام ( المرحاض) واختيار وارتداء الملابس. بمساعدة وبفضل المساق نجحت ارتب زاوية العاب جديدة اللي بتدعم اهتمامات ابني الكبير . ومع كل الصعوبة بعمل تغييرات بفترة اللي في بيبي جديد بالبيت ، ميجي وجونا اعطوني كل الدعم عن طريق المساق لتحقيق الهدف. بإلاضافة نجحت ارتب لابني خزانة ملابسه بطريقة اللي صار بنفس يوم التغيير يختار ملابسه لوحده بدون نقاشات وصراعات .
   بدون علاقة قديش متبعين وبتآمنو بنهج مونتيسوري، هذا الكورس اجباري برأيي لكل بيت.
   بحب اعطي مثال صار معنا هاليومين لكيف البيئة المجهزة بتدعم استقلالية الطفل: جود ابني الكبير بالوقت اللي كنت انيم اخته الصبح، طال عدة الدهان ، حضر الطاولة مع الالوان والريش وكباية المي وورق للتنظيف. جاب بيض من كلكر ودهنهن. وبعد ما خلص نظف كل اشي من ورا وايديه كمان.
   نجح يشتغل باللي كان حابب يعمله بشكل مستقل بفضل انه البيئة مجهزة وبتدعم رغباته.

10. 

    تم التقييم 4 من 5

    shosh_ma89@hotmail.com (مالك موثوق) – فبراير 3, 2021

    اجا الوقا اني اكتب تقييمي الشخصي عن الكورس من بعد ما كنت بالاساس مترددة كتير اذا انضم للكورس او لا، بس من بعد ما سمعت من عدة صديقات لالي عن الكورس تشجعت وسجلت. اول اشي بدي احكيه عن ميغي وجونا انهن بخلو الواحد يشعر جدا مرتاح بالتعامل معهن.. ويسألهن ويشاركهن بتجربته وبصعوباته ضمن اطار الكورس والتربية بشكل عام.. صراحة ولا مرة سألت سؤال وما كان الي رد وجواب وافي وشامل.. كتييييير متعاونات ومتفهمات ومهنيات جدا جدا. بخصوص الكورس ومضامين الكورس كانت جدا رائعة وشاملة ومتسلسلة بطريقة اللي ما تخربطنا انما ترتبلنا افكارنا وتخليها متسلسلة ورا بعض. طبعا كتير شغلات نجحت احققها من خلال هذا الكورس بالتعامل مع ابني وتجهيز البيئة الو.. والاهم انه اشعر ابني عم بتقدم وبتطور باستقلالية وراحة واضحين جدا عليه.
    في البداية ما كنت اعرف شو اتوقع من الكورس، بس الافتتاحية بهالكورس ساعدتني كتير افهم شو رح امرق واحدد اهدافي صح. وهاي كانت الخطوة الاولى الاساسية. مرقت كتير وكل نجاح كنت احققه كنت اشعر كتير فخورة ومبسوطة انه عم بعمله لابني بالاساس.. وبنهاية هالكورس بقول بس شكرا لميغي ولجونا لوقتهن الثمين ولاستجابتهن السريعة للاشياء، وما كنت بقترح تغيروا اشي بالكورس لانه مرتب شامل ومتسلسل.. بس كنت بقترح شغلة وحدة انه ما يكون كل يوم تنزيل مهمة جديدة لانه انا شخصيا كنت اشعر اني لازم انجزها وانهيها سريعا لاني ما بحب اخلي اشي يتراكم هههه بنضغط. بس بفهم انكو محددين وقت للكورس ولازم تنهوه بالوقت.
    شكرا شكرا شكرا عكل اشي.. واذا فكرتو تعملو كمان كورسات مونتيسوري بمواضيع مختلفة بتخايل رح اكون من اول المشاركين 😊⚘⚘

11. 

    تم التقييم 5 من 5

    Suha Haddad (مالك موثوق) – فبراير 8, 2021

    كورس جدًا قييم وممتع، خلاني اتبنى نهج واضح وسليم في التعامل مع بنتي. كورس بعطيك المعلومات اللزمة لتعرف كيف تخطط الاهداف الصحيحة بالوقت الصحيح، فيما يتعلق بالفترات الحساسة للطفل.
    ماغي وجونا الرائعات، اهتموا يوصلولنا المعلومات والدعم المعنوي اللزم لنحدث التغيير.
    كان كتير حلو انسق غرفة بنتي وانا عارفه كل قطعة ليه موجودة فيها، وكيف استخدمها لمصلحة تشجيع بنتي تكون مستقلة ذات ارادة وثقة.
    بنصح الجميع دوم استثناء… ان كانت ست بالطريق للامومة او مع عدة اولاد.
    وشكرًا من القلب.

12. 

    تم التقييم 5 من 5

    ريم عابد (مالك موثوق) – فبراير 11, 2021

    مساق مميّز ورائع، بقدر أقول كل وقتي اللي قضيته فيه ساعدني وأدّى لنتائج حلوة ومثيرة للإهتمام.
    سجلت للمساق وانا بدي اوصل هدف واحد؛ بيئة مجهّزة لإبني تساعده على الإستقلالية والإنجاز
    خلال المساق، وبعدني مش واصلة نهايته، تعلمت كتير شغلات ووصلت كتير أهداف محل الهدف الواحد، مثل اني أعطيه يثري قدراته ويطورها حسب اهتماماته هو وحسب الفترات الحساسة ومش حسب اي منهج رسمي، ، والنتائج كانت كتير حلوة،
    مثل ترتيب وتصنيف لكل المعلومات المخربطة اللي كانت براسي من مصادر متعددة كإم لأول ولد،
    مثل استعمال زوايا البيت المتعددة لخدمة تطور الطفل،
    ومش بس زوايا البيت، الفعاليات اليومية اللي منعملها كلنا بسرعة وبدون تفكير وبس لأجل نخلصها، صارت متعة وتعليم ووقت مشترك وحلو مثل وقت المطبخ.
    هاد جزء صغير من تأثير المساق علينا
    ميغي وجونا شكرا عالتغيير اللي عملتوه بحياتنا، وشكرا عالنظرة المختلفة وعالطريقة اللي بتخاطب العقل، مش مفهوم ضمنا❤
    وانا شخصيا بانتظار كل مساق جديد بتعملوه بمواضيع جديدة🌷🌷

13. 

    تم التقييم 5 من 5

    hayafiad@gmail.com (مالك موثوق) – فبراير 24, 2021

    عند حملي بطفلي كنت شبه متأكدة اني سأتبع بتربيته نهج مونتيسوري.. قرات عدة كتب لماريا مونتيسوري.. وعرفت اكثر عن النظرية .. وشدتني نظرتها لاهمية البيئة المجهزة في عالم الطفل ودعمه لاكتشاف نفسه .. لكن بعد ولادته كانتةلا تزال تنقصني الامكانيات لتطبيق هذه النظريات… في المساق تجهيز البيئة من ميغي وجونا وجدت الحل لكل تخبطاتي وافكاري… التطبيق العملي بالدمج مع الفلسفة اعطاني الفكرة وللخطة اللازمة لوضع رؤيتي على ارض الواقع وساعدتني قي استغلال وقتي مع طفلي بشكل ناجع… في المساق وجدت اجابات لاسئلتي… كيف يمكن دعم طفلي في لعبه وتطوير مهاراته… شكرا جونا وميغي على الدعم الدائم.. الارشاد والنصائح العملية وخطة عمل اكثر من رائعة

14. 

    تم التقييم 5 من 5

    حنان خوري (مالك موثوق) – فبراير 26, 2021

    انضميت للكورس بعد فترة من متابعة صفحة “قصتي مع مونتيستوري”.
    بالمنشورات بالصفحة كنت الاحظ هدوء معين بالاطفال، قدرات متطورة جدا لعمر الاطفال، مشاركة الاطفال نابعة عن رغبة.. هادا الشعور العام اللي اخدتو من الصفحة حفزني اتعلم اكتر عن الموضوع واخذت الدورة (الكاملة).
    الدورة كانت شاملة مواضيع عديدة، مفصلة جدا. ميغي وجونا تعبانين على المواد المعروضة وواضح انو كل المنشورات مرقت تعديلات عديدة على مدى الوقت اللي خلتها توصل لهدا المستوى من المعلومات والتفاصيل.
    مرافقة الصبايا كانت مثالية، دايما في رد للاسئلة، اهتمام بتفاصيل المشتركين واعطاء نصائح حتى بدون طلب.
    “الصعوبة” بالكورس هو وجود وظائف عملية، اللي هي عبارة عن تعزيل، تغير ترتيب بالبيت، تفكير عميق بكيف ممكن كل زاوية تتغير بالبيت تتلائم المنهج. بس طبعا المرافقة بتساعد الاشي يصير. ولمن التغيير بنعمل، التاثير على الاطفال واضح.
    بعد هادا الكورس حسيت انو اندماج بناتي بكل ما يحدث بالبيت باليوم يوم زاد كتير، رضاهن واضح وطبعا رضاي انا من الوضع كبير!
    ا
    خلال الكورس كان في شوية اسئلة من المشتركات بخصوص السلوك والتصرف، ووضع حدود. الاجابات كانت كتير مفيدة، والطريقة عجبتني. كنت بحب لو بتضيفو كورس مخصص لسلوك الاطفال وطريقة تعامل الاهل حسب ماريا مونتيسوري.

    للانهاء، بحب اختم بشكر كبير على تعبكو وعلى مساهمتكو باقصى التفاني، وبالطف الطرق ❤️

    • 

      Meggie Hakim – فبراير 26, 2021

      حنان الغالية، يفرحني كتير أقرأ كلماتك واعرف أنه تأثير الكورس نتيجته بينت عالبنات 🥰
      بالنسبة لكورس السلوكيات فسعيدة اخبرك أنه سمعنا الطلبات المتكررة فاشتغلنا وجهزنا 3 ورشات تفاعلية عن نوبات الغضب، بدائل العقابات ودعم الاستقلالية! كورس متكامل – 9 ساعات بالزووم بتعاون مع رغدة برانسي الرائعة، موجهة مجموعات بحسب أدلر. الكورس صار بالموقع واسمه: ورشات أهالي عن السلوكيات: “والديّتنا: ما بين أدلر ومونتيسوري”

15. 

    تم التقييم 5 من 5

    لارين عراف (مالك موثوق) – فبراير 28, 2021

    كورس اكثر من رائع، غني بالمعلومات المهمه اللي بتلخص كل اشي بخصوص تجهيز البيئه الصحيحه للاطفال من جيل الصفر
    انا كان بدي اتعرف على هذا المنهج من الاول وهذا الكورس هوي العنوان الصح
    ميغي وجونا عرفو كيف يوصلولنا المعلومات بطريقه ذكية، ملخصه وممتعه والاهم بالمتابعه اللي بعد الكورس واجوبتن على الاسئله اللي بتخطر عبالنا.
    شكرا كثير عمجهودكو وعنجد عنجد منفتخر فيكو انكو عم توصلو هذا المنهج لمجتمعنا

16. 

    تم التقييم 5 من 5

    نجوى عثامنة (مالك موثوق) – يونيو 9, 2021

    من اول الحمل او حتى من اول ما بلشت اهتم في عالم الاطفال والتربية وانا اتابع عدة صفحات بالعبري واقرأ كتير وكتير اكتسبت معلومات وغيرت نظرتي لعدة مفاهيم غلط كنت اعرفها من قبل،
    بس لما اشتركت بالكورس عندك، مع انه كتير شغلات كنت اعرفها الا اني اكتبست ملان معلومات جديدة ما كنت اعرفها، وبتعرفي شو حتى لو كنت اعرف بكفي المعالمة الشخصية والمرافقة تبعتكوا هادا لحاله كافي يحسسني ثقة بتعاملي مع بنتي ونظرتي للتربية الصحيحة..
    بذكر انه اخدت الكورس بفترة كتير ضغط ومش كل يوم كنت اعطي من حالي للكورس زي ما لازم بس جونا جننتني وهي كل يوم تبعتلي انه يلا شاركي ( مع انه صرت دافعة الكورس ) لو اشتركت بكورس عند يهود مكنش حدا بفرق عنده لانه المصاري كانت واصلة!
    وغير انه كنتوا تجاوبوني بساعات غير عادية الي مفروض تكون هاي اوقات راحتكوا..
    وبالنسبة للمتجر صح انتوا مش محل العاب بس قبل ما كنت افتش في محل تاني اول افوت عندك على المتجر وافحص اذا موجود
    وعدة مرات انت حكتيلي انه لا هادا على الفاضي وهادا مش ضروري ولما كنت اشتري من محلات يهود محدا كان يهمه شو بشتري ولشو بشتري، ف دايما كان واضح الي انه اول شي عندك مهم العلاقة الشخصية والخدمة المهنية من القلب حتى لو ع حساب انه ما تربحي هل اكم شيكل..
    وفي مرات عندك فرقية بالسعر بس هدول الاكم شيكل الي دفعتهن عندك زيادة عن باقي المحلات كانت تستاهل لانه بالمقابل كنت اخد منتج الي عنجد بنتي بحاجته ومش بس اكوم العاب على الرف..
    ف بحب احكيلكوا كملوا واحنا منحبكوا وشكرا من القلب ❤️

17. 

    تم التقييم 5 من 5

    razan halabi (مالك موثوق) – أغسطس 11, 2021

    كانت ورشة رائعة ومفيدة وغنية جداً. تقريبا أنتو عايشين معنا بالبيت بكل تفصيل بيخص ألعاب أيليام وكيفية التعاطي معه.
    الورشة كانت شاملة وكاملة، وبنصح يلي عنده طفل عمر شهور متلنا يبلش بالكورس من هلئ، وياخد ملاحظات عكلشي ويدونهم ويحطهم قدامه ليراجعهم بس ابنه يكبر، كونه في معلومات لسنين أكبر أيضاً ومش بس لعمر ابننا هلء.

    لحتى ما يضيع علينا اشي، علقنا الرسم البياني المتعلق بالفترات الحسية قدامنا بالصالة وبهالطريقة ما بيفوتنا التركيز عاشي (بتمنى) + عملنا واحد عكل السنين تاعت إيليام، وبهيك منعرف انه بالشهور كذا أو السنوات كذا بتكون الفترة الحسية كذا وبالتالي لازم نركز عكذا وكذا من نشاطات وألعاب.

    ملاحظات أخرى:
    رزان: أنا كنت بفضل اللقاءات الوجاهية والمحددة كل الوقت، بحس بالجدية والالتزام (بلزم نفسي بشكل أفضل). بس بفهم جدا هالأسلوب لحتى يكون المساق مرن وملائم للجميع.
    ربيع: بعض الملاحظات التقنية من ناحية استخدام تقنيات التعليم عن بعد.

    وغير ذلك، شكراً جزيلاً عكم هالمعلومات وعالمرافقة ويعطيكم العافية وإلى الأمام بهالعمل المميز والمفيد جداً ويلي منتمنى يصير نمط الحياة العام ومش فقط فئات معينة، كونه جداً مهم عصعيد المجتمع.
    ننصح وبشدة الأهالي البدء بكورس اللعب لنفهم كيف فيه المنتيسوري يصير نمط حياة رائع.

    بوسات منا إلكم ماچي وجونا ♥️

    إيليام ورزان وربيع