المجموعة الشمسية: مجسم وبطاقات اللغة

خلال الاسبوع الماضي، قررت اعمل عمل جريء: أرتّب خزانة الالعاب بينما مارلينا وادوار معي. بهاي الخزانة بخزّن  كل الالعاب اللي مش معروضة عالرفوف، بما فيها العاب لأعمار أكبر من أعمار أولادي، اللي شريتهم حتى اتفحصهم قبل ما نعرضهم بالمتجر.

من كل هذه الالعاب، استقطبت اهتمام مارلينا لعبة المجموعة الشمسية، وهي عبارة عن مجسمات الشمس والكواكب اللي بحاجة لدهنها وتركيبها للحصول على نموذج مصغر للمجموعة الشمسية (او دوارة للتعليق بلعبة أخرى متاحة حالياً بالمتجر).

ثاني يوم الصبح، سألت مارلينا شو حابة تلعبي اسا؟ زي ما بعمل بشكل عام وجوابها القاطع كان: “بدي اللعبة اللي بالخزانة اللي فيها شمس”

عارضت شوي بالاول، لانه اللعبة لعمر أكبر، بتحتاج مهارات بالدهن وسيطرة كاملة ودقيقة على حركة اليد، بالاضافة، ما حكينا أبداً عن الكواكب والمجموعة الشمسية وبعرفش أصلاً من أين أبدأ.. الموضوع مجرّد كتير لاطفال صغار!

مارلينا أصرّت، الياس اقترح نبدأ من الشمس.. لانه سهلة.. فكرت بيني وبين حالي: بنفع، الشمس بسيطة، كلها اصفر، سهل اشرح عنها بسهولة، مهي بتعرفها.. وهيك بدأنا .

 

يوم 1: الشمس

–       أحضرت بطاقة اللغة مع الصورة والاسم: “الشمس” وعرضتها على مارلينا: “هاي الشمس”

–       خبرتها انه الشمس نجم، مثل كل النجوم اللي بالسماء، بس هي أقرب علينا ولهاد السبب منشوفها اكبر. معلومة بسيطة ومفهومة لعمر 3 سنوات، لا؟

–       طلبت منها تلاقي الشمس من بين المجسمات باللعبة (أكبر مجسم) ووضعناها بمركز نموذج المجموعة الشمسية.

–       عرضت عليها فيديو مع صور حقيقية للشمس حتى تتعرف عالوانها ومنظرها الحقيقي، فرجيتها كيف كل الوقت في انفجارات بالشمس وانها حامية كتير.

–       أجا وقت الدهن: لونت مارلينا الشمس باللون الاحمر وضافت الانفجارات بالاصفر

(كنت فخورة كتير بهاي اللحظة: انا كل حياتي ارسم الشمس بزاوية الصفحة، صفراء مع وجه ضاحك واشعة بشكل خطوط منبثقة منها وهاي بنتي عمرها 3 سنوات وبتلون انفجارات الشمس!)

–       بعد تأمل نجم الشمس بفخر كبير، وضعناه على الرف وأمامه بطاقة اللغة: “الشمس” بالايام القادمة، ل

ما مارلينا طلبت، تعرفنا عكوكب واحد جديد بكل يوم، دائماً بنفس الطريقة اللي رح أشرححها هنا وما أكررها. لاحقاً بالمنشور، رح أشارككم بالمعلومات الاساسية اللي ممكن تشاركوها مع اطفالكم بالنسبة لكل كوكب وبالاضافة الاكتشافات اللي ممكن يكتشفوها عن طريق اللعبة

 

لكن أولاُ: طريقة العرض:

1.  عرض بطاقة اللغة الملائمة للكوكب وذكر اسم الكوكب مرتين او ثلاثة والطلب من الطفل أن يكرر الاسم (المرحلة الاولى من درس الثلاث مراحل لتعليم اللغة بحسب مونتيسوري)

2.  اعطاء معلومة عن الكوكب (بحسب عمر الطفل ومعلوماته)

3.  التفتيش سوياً على الكوكب من بين المجسمات

4.  العد سوياً لايجاد موقع الكوكب بنموذج المجموعة الشمسية بحسب بعده عن الشمس

5. مشاهدة فيديو قصير او كتاب مع رسومات واقعية، ذكر معلومات مهمة والتمعن بشكل والوان الكوكب

6. اختيار الالوان، دمج الالوان للحصول على الوان اضافية ودهن المجسم

7. اعطاء درس الثروة اللغوية والمعلومات العامة بطريقة درس الثلاث مراحل: “وين كوكب 1؟ وين كوكب 2؟ ، شو اسم هاد الكوكب؟ الخ”

8. وضع المجسم والبطاقات التي يعرفها الطفل عرف الالعاب والتأمل بفخر به

 

معلومات واكتشافات تعلمناها من خلال التعرف عالكواكب المختلفة:

يوم 2: ميركوري (عطارد)

أصغر كوكب بين كل الكواكب وأقرب كوكب عالشمس. ميركوري مكون من الصخور والمعادن لذا لونه أقرب عالأسود

يوم 3: جوبيتر (المشتري)

أكبر كوكب بين كل الكواكب، الخامس بالبعد من الشمس. مكون من الغازات، يغلب عليه اللون البني والبرتقالي.

اللون البني غير متوفر في الرزمة فاكتشفنا إن دمجنا الاخضر مع الاحمر نحصل على البني.

يوم 4: فينوس (الزهرة)

أكثر كوكب ساطع بين الكواكب ودرجة حرارته هي الاعلى. هو ثاني كوكب بالبعد من الشمس. يسمى “الكوكب الشقيق” للكرة الارضية لانهما متشابهان من حيث التركيب والحجم.

لونه أصفر فاتح فاستغليت الموضوع كي أعرض لمارلينا كيف نحصل على لون أفتح عندما ندمج اللون مع اللون الابيض: لون + أبيض = لون أفتح

يوم 5: الارض

كوكبنا، الثالث بالبعد عن الشمس، مكوّن من يابسة ومياه. لما وجدنا كوكب الارض من بين الكواكب المتبقية، أعطيتها تلمسه بنعومة وشرحتلها: الاجزاء النافرة لبرا هاي الارض والباقي هاي البحور والمحيطات. توجهنا سوا لخريطة العالم المعلقة عنا بمساحة اللعب وقارنّا بين القارات بالمجسم لبين القارات عالخريطة (الصراحة كتير انبهرت من صحة ودقة المجسم بالرغم من حجمه الصغير!) واتفقنا انه الاجزاء النافرة لازم تدهنهم بني، والباقي ازرق. ساعدت شوي بانه أأشرلها وين تدهن بأي لون للتسهيل عليها.

بالايام القريبة انشالله منكمل باقي المجسمات وبضيف المعلومات الكم هون

لشراء اللعبة زوروا الرابط:  الرزمة تحتوي على الموبايل، بطاقات اللغة وبالاضافة على مفرش سفرة للمجموعة الشمسية، لوضعه تحت الصحن والشوكة والسكينة خلال الطعام.

مجسمات وبطاقات الثلاث أجزاء – المجموعة الشمسية

 

 

 

 

 

0 تعليقات

اكتب تعليق

لن يتم نشر عنوان بريدك الإلكتروني.