جوات كل طفل فنان – الجزء الثاني: عرض المواد

طريقة عرض المواد مش أقل اهمية من المواد نفسهم اولاً لجذب الطفل للفعالية وثانياً لمنحه الاستقلالية الكاملة لاختيار الفعالية، استعمالها وتنظيف البيئة ونفسه بعد الانتهاء من الشغل. مع الوقت، طريقة عرض المواد قد تختلف بسبب جاهزية الطفل والمساحة المتاحة بالبيت. هاي هي المراحل المختلفة اللي لاءمتنا:
المرحلة الاولى (عمر سنة لسنة ونص تقريباً):
عرض مادة جديدة عن طريق وضعها عطاولة مارلينا مع كل الادوات اللازمة (مثلاً اذا الفعالية هي دهان جواش فبحط عالطاولة: مريول، ورقة، دهان لون واحد بكمية صغيرة، فرشاة، شريطة للتنظيف) وبجلس معها افرجيها كيف منستعمل المادة وكيف مننظف بس نخلص شغل مع المادة. مهم جداً تحديد منطقة الفنون من البداية – وين مسموح نستعمل ايش. بحالتنا طاولتها هي المساحة المسموحة: سهلة للتنظيف، سعرها مش غالي وفش سجادة تحتها. هذا التحديد بقلل من العصبية بالبيت لما الطفل عم بستعمل مواد بتوسخ وبحول النشاط لتجربة ايجابية ممتعة للطفل والنا.
المرحلة الثانية:
عرض المواد بشكل دائم على الرف بصواني عالرف، كل صينية بتحتوي كل شيء بتحتاجه (نعم.. مع المريول وشريطة التنظيف والكاسة للمي والورقة، الخ.. ). بدأت مع صينية فنون واحدة عالرف وكل فترة بغير مادة الفنون. بالاضافة مع الوقت كبرت عدد المواد المعروضة مثلاً عدد الالوان، عدد الطوابع، الخ.. طبعاً مكان الشغل هو ذاته: الطاولة او المكان المحدد ك “مسموح”
المرحلة الثالثة (الصورة):
لما مارلينا تعرفت عكل المواد واتقنت استعمالهن انتفلنا لتخزين كل مادة بجارور مختلف (ممكن تستخدموا علبة او صينية أيضاً) وتخصيص جارور للورق والمريول والفراشي الاضافية. بهاي الطريقة كل ادوات الفنون مهيئة لاستعمالها باي لحظة. هاي المرحلة كتير مهمة لانه الطفل عنده الاستقلالية باختيار اي مادة بده يستعمل والاهم ببدأ يستخدم المنطق السليم ليحضر كل شيء بحتاجه للفعالية. للتوجيه (بما انه عنا الجوارير مش شفافة): عكل جارور علقت صورة المادة.
هاي المرحلة اللي ناسبتنا حتى عمر 3 سنوات.
ممكن انتو يلائمكم شيء آخر.. مثلاً جونا حولت طاولة ايكيا لطاولة فنون.. بتقدروا تشوفوا الطريقة هون:  https://www.mymontestory.com/2020/03/02/طاولة-الفنون-hack/ ‎
كل مواد الفنون ممكن تلاقوها وتوصوا عليها مباشرةً من الموقع: https://www.mymontestory.com/product-tag/art/
شاركونا بصور مساحة الفنون ببيتكم بالتعليقات
0 تعليقات

اكتب تعليق

لن يتم نشر عنوان بريدك الإلكتروني.