الخطوة الاولى لتطبيق منهج مونتيسوري

سمعتوا وقرأتوا عن تربية مونتيسوري بس مش عارفين من وين تبدأوا بالتطبيق؟ نصيحة الكو بهاد المنشور:
بكلمتين: الحياة العملية
شاركوا اطفالكم واولادكم بالحياة اليومية، اعطوهم مهام اللي بتتلائم مع قدراتهم وخلوهم يشعروا بالنجاح انهم ساعدوا، عملوا اشي لحالهم ونجحوا. هاي المهام البسيطة رح تساعدهم يطوروا التركيز، السيطرة وتنسيق الحركة واهم اشي الاستقلالية واكتساب المهارات الحياتية. والاهم، بتجهزهم يوخدوا دورهم كشخص مفيد بالمجتمع.

اطفالنا براقبوا كل حركة النا وبستوعبوها وبقلدوها، وظيفتنا نزودهم بالآليات البسيطة واللي بتتلائم مع حجم ايدهم الصغيرة عشان يقدروا ينجحوا وتزيد ثقتهم بقدراتهم. فادمجوهم معكو بالمطبخ، بالتنظيف، بالحديقة، بالسوبر وبالاهتمام بنفسهم. شوية امثلة عملية لجيل ١٢-١٨ شهر:
– نعطيهم كباي صغيرة جداً عشان يتعلموا يشربوا،
– معلقة صغيرة عشان يقدروا يمسكوها ويسيطروا على حركتهم بسهولة،
– شريطة ينظفوا الطاولة او الارض اذا وسخوا،
– فرشاي ليمشطوا شعرهم،
– قنينة صابون صغيرة ليغسلوا يديهم،
– ابريق سقاية للزريعة خفيف وصغير اللي يقدروا يحملوا بسهولة
اذا معنيين بافكار لاجيال تانية حكولنا، الافكار لا نهائية فبس لازم تبدوا من شي محل بمساعدة ادوات موجودة بالبيت.  

0 تعليقات

اكتب تعليق

لن يتم نشر عنوان بريدك الإلكتروني.