نشاط خريفي 1: سلة الكنز

العمر: 0-5 سنوات

كيف؟ فتشوا بالطبيعة او بالسوبر او بدكاكين فنون على امور الها علاقة بالخريف ورتبوها بسلة او وعاء لاطفالكم ليستكشفوها.
مثلاُ: هديك السنة رتبت بالوعاء طبيعة مستوحاة من الخريف (الورق البني، الصنوبر، البلوط، ثعلب مع فروة خميلة..) وهاي السنة فضلت انه اضع شغلات اكبر بالحجم لانه إدوار بحط كلشي بتمه فوضعت بالاناء انواع قرع مختلفة بكل الاشكال والالوان والملامس. من ناحية هاد نشاط حسّي  يعني بشغل الحواس المختلفة: مثلاً ادوار بمسك القرعات المختلفات بشعر بالاوزان المختلفة، الملامس المختلفة، بشوف الالوان وبشعر القشرة، بحطهم بفمه والحلو انهم Bio 100%
مع مارلينا منحكي عكل هاي الصفات المختلفة وعبر الدمج بين التجربة الحسّية والكلمات بتتعلم كلمات جديدة وبتنمي ثروتها اللغوية ومعلوماتها العامة.
بأعمار اكبر ممكن الاطفال يختاروا يرسموا شو شايفين او يلاقوا اشياء بالبيت بنفس اللون، او الشكل. بمونتيسوري منسمي الاشي: “نقل إلى البيئة”
الحلو بالنشاط هو انه ملائم لاعمار مختلفة وممكن يقودنا لكتير احاديث ونقاشات ومواضيع مختلفة وبنفس الوقت زيّنا البيت .. عصفورين بحجر
جربتوا النشاط؟ شاركونا بالصور بالتعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.