اسبوع 5: دوّارة الموناري

اول “لعبة” بحصل عليها كل طفل حديث الولادة هي الدوّارة (mobile). الدوّارة هي اللعبة اللي بتتعلق عتخت الطفل عشان تسلّيه او تساعده ينام. بشكل عام بتكون مشغّلة عبطاريات وبتدور، مرات كمان بتضوي.

وطبعاً إدوار كمان حصل على دوّارة.. ومش حيالله واحدة. واحدة شغل ايديّ! وإلها اسم: “دوّارة الموناري” (وللاختصار رح اسمّيه: الموناري)

الموناري هي اول دوّارة من سلسلة الدوّارات المونتيسوريّة اللي بالاضافة لكونها مسلّية بتهدف لتطوير التركيز عند الطفل، إدراك العمق، التنسيق بين اليد والعين وغيرها من المهارات الأساسية. بكلمات تانية: “شغل الطفل” بأسابيعه الاولى بالعالم، ولهذا السبب الموناري بتعلّق بمساحة اللعب (إرجعوا للتدوينة من اسبوع 4 للمزيد من المعلومات) ومش فوق السرير.

الموناري هو موبايل بصري ثلاثي الابعاد باللونين الاسود والابيض، يعلّق على بعد 30 سم من الطفل، بوازن بين اشكال هندسية وبين كرة زجاجية شفافة اللون اللي بتعكس أشعّة الشمس وبتحرك حركة طبيعية على نسمة الهواء. التناقض بين اللون الابيض والاسود وانعكاس الاشعة بجذب الطفل بطريقة رائعة. بجيل 4 اسابيع إدوار ممكن يقضي 15 دقيقة او شوي اكتر وهو يتأمّل.

 

اذا كمان انتو حابين تجهزوا الموناري لاطفالكم فهاي هي الطريقة:

1. طباعة الاشكال الهندسية من هذا الرابط

2. قص الاشكال الهندسية وإلصاق كل شكلين متطابقين

3. صنع ثقب صغير بإعلى كل شكل وإدخال خيط للتعليق

4. شراء، قص، ودهن الاوتاد. إلصاق شريط لاصق باللون الاسود على الوتد الابيض

5. والجزء الصعب: موازنة الاشكال والكرة الزجاجية بحسب الصورة ابتداءاً من الوتد السفلي

 

جهزتوه؟ شاركونا بالصور.. مقلّلين خواص؟ مش مشكلة.. بتلاقوا دوارة مستوحاة عنا بالمتجر هنا

معنيين بكتب بألوان متباينة بالاسود والابيض؟ شوفوا اقتراحاتنا هنا

 

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.