اسبوع 16: رفوف الالعاب

الطفل بحتاج للنظام بالبيئة من أجل الراحة النفسية وبناء القدرة على الاستدلال (أيش وين)، لهاد السبب بحسب منهج مونتيسوري منشجع استخدام رفوف العاب بدلاً من صناديق ألعاب أو صناديق على الرف. كل لعبة الها مكان واضح عالرف ومحصورة في صينية او سلة. ممكن تفكروا انه هاي الأسس تنطبق على الأطفال الأكبر سنًا ولكن المفضل أن نتبع الشيء منذ الولادة.

اخترت اكتب عن الموضوع بهاد الاسبوع لانه لاحظت انه إدوار بدأ يقلب بسريره. لما بخطه بالتخت ينام بكون على ظهره بس لما بفيق بلاقيه على بطنه والاشي بعني انه سريعاً رح يصير يهتم بالرفوف ويصلها بقواته الذاتية. عالأغلب مش رح يستخدمها بشكل فوري او في كل مرة بده لعبة. الاشي بستغرق وقت لحد ما تقوى عضلاته كفاي ويفهم شو هدف الرفوف هاي، بس هي رح تكون مرتبة وجاهزة لحد ما يصير هو جاهز. هاي وظيفة المرشد والمربي بالصف أيضاً.

رح أشارككم بهاي التدوينة باكم نصيحة بالنسبة لترتيب الرفوف لطفل صغير:

  • رفوف منخفضة قدر الامكان حتى تمكّن الطفل من استخدامها قبل ما بدأ بالجلوس او الوقوف بنفسه وتبني عنده الاستقلالية
  • الحد من عدد الالعاب على الرف لكي نساعد الطفل على بناء النظام شوي شوي (كل لعبة وين محلها) والحفاظ على بيئة غير مفرطة بالمحفزات عشان تساعده بالتركيز
  • مفضل الاستغناء عن السلال والصواني ووضع كل لعبة على رف بهاد العمر اولاً لأنه معظم الالعاب لا تتخلل على قطع انما هي عبارة عن قطعة واحدة وثانياً، لانه مستحيل يقدر يحمل صينية بشكل مستقل وهدفنا ندعمه انه ينجح ومش يفشل
  • مهمتنا: المساعدة في الحفاظ على النظام من خلال أنه نكون نموذج لإرجاع كل لعبة الى مكانها الصحيح بعد الانتهاء من اللعب بها. عن طريق هاي العملية البسيطة، اولاً البيئة بتضلها مرتبة وثانياً مندعم الطفل بأنه يتصرف بنفس الطريقة لما يفوت بالفترة الحساسة للترتيب والنظام اللي بتبدأ بعمر سنة ونصف تقريباً.ومهمتنا الثانية إثارة اهتمام الطفل بالالعاب عن طريق انه نجيبها من الرف ونلعب فيها معه

شاركونا بصور رفوف الالعاب لاطفال بعمر 0-12 شهر مع ذكر العمر

حابين تكتسبوا المعرفة كيف ترتبوا البيئة لاطفالكم بحسب منهج مونتيسوري؟ انضموا لكورس الاهالي القادم عالسريع 🙂

 

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.