اسبوع 14: الجيم – أهم لعبة بأول 6 اشهر اولى

بعد تجربتي مع طفلين، اذا كنت مجبورة أختارلعبة واحدة فقط، لأطفالي بأول 6 اشهر من حياتهم مفش شك اني بختار الجيم.. ليش؟ لاني بحب الالعاب اللي بتشغل الطفل بتطوير مهارات مهمة وبنفس الوقت بتخدم لفترات طويلة (ونعم 6 أشهر هي فترة كتير طويلة بهاد العمر.. فكروا بس كيف الطفل بولد عاجز، بقدر بس يبكي، يتغذى عالحليب، يخرج ويتحرك بطريقة غير ارادية اما بعد 6 اشهر فبصير يضحك، يتفاعل، يمسك ويحط اشياء بتمه بطريقة مقصودة، يقلب ووو وكل هاد التطور هو سوا بنفسه، بقواته الذاتية عن طريق اللعب!)
الجيم هو عبارة عن جسر خشبي اللي الطفل بستلقي تحته، معلقة منه العاب مختلفة هدفها تنمي الحواس والمهارات الحركية. بالبداية مفضل إبقاء لعبة واحدة ومع الوقت إضافة المزيد أو تبديل الالعاب لابقاء الطفل مهتم ومركز بتطوير ذاته.. ممكن بالاضافة تعليق الدوارات البصرية والحسية منه. مع الوقت، الطفل ببدأ يمسك الالعاب (بايديه وباجريه) بعدين ببدأ يقلب لانه الالعاب اللي ممكن نعلقها عالجنب كمان بتلفتله انتباهه. ممكن تعليق العاب طويلة لنزيد اهتمامه خلال فترة اللعب عالبطن او فك الالعاب ووضعها شوي بعيد عنه عشان نشجعه يحبي!
الفروقات (الكبيرة) بينه وبين البساط مع النشاطات الشائع بدكاكين الالعاب هي:
  • البساطات بشكل عام بتكون مرشومة بالصور المتحركة والالوان بينما الجيم أروق للنظر وما بشتت الطفل
  • بالبساطات بشكل عام مش ممكن عزل النشاطات (أصوات، الوان، اضوية) وحسب مونتيسوري مهم عزل الحواس لنصل للنتيجة الافضل وتطوير قدرة الطفل عالتركيز.. بينما الجيم (عادةّ) بحتوي على عدد صغير من النشاطات وبالاضافة ممكن إزالة الالعاب وعزل الالعاب بحسب نوع المهارة. الحفاظ على #تركيز الطفل من عمر صفر هو وظيفتنا الاهم بهاي الاعمار لانها بتأثر عالطفل لمدى الحياة. اقرأوا عن الموضوع أكثر في تدوينتي مونتيسوري_بيبي – أسبوع 2
  • بما انه ممكن ازالة الالعاب المعلقة بالجيم، ممكن تعليق أي العاب ثانية مثل دوارات بصرية او حسية (لأفكار أكثر ارجعوا لتدوينتي من اسبوع 13 عن الدوارات الحسية اللي ممكن تصنعوها بنفسكم بسهولة بالبيت)
بإختصار الجيم هي اللعبة ال must وبعدنا منستعمله لليوم (6 اشهر+)..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.