اسبوع 13: الدوارات الحسية

بالتدوينة الأخيرة خبرتكم كيف إدوار بدأ يمسك بيده.. باللا وعي بشكل عام ومرات بطريقة إرادية مثل لما بكون يلعب بالالعاب المعلّقة عمقعده او لما بمسك كتاب للحظات قصيرة جداً. حتى أعطيه المجال انه يطوّر هاي المهارة الجديدة المهمة جداً جداً، استعملت بضع دوارات حسية اللي كنت اعلقهم بمساحة اللعب بغرفته او غرفة المقعد.

معظم الدوارات مبتكرة وسهلة جداً للصنع من مواد متوفرة بالبيت فرح اشارككم فيها وبطريقة صنعها – على أمل انه تعرضوها على أطفالكم الصغار كمان:

١. دوارة جرس العيد:

بين زينة عيد الميلاد وجدت جرس مدوّر صوته ناعم كتير ومصنوع من المعدن. قمت بتعليقه بواسطة مغيطة من السقف (ممكن طبعاً تعليقه من الجيم أيضاً).

شو بميّز دوارة الجرس؟ المعدن البارد لللمس والصوت الناعم اللي بنتج عند تحريك الدوارة

٢. دوارة الحلقة:

أستعملت عضاضة مارلينا الخشبية (اللي عفكرة كانت لعبتها المفضلة بالاشهر الاولى) كدوارة (شوفوا الفيديو بتدوينة الاسبوع الماضي) عن طريق ربطها بمغيطة وتعليقها من السقف

شو بميّز دوارة الحلقة؟ سهولة الامساك بالحلقة الرفيعة والصوت الناعم اللي بنتج عند تحريك الدوارة

اذا عم بتفتشوا ععضاضات او خرخشيات خشب اللي ممكن تستعملوهم كدوارة بالطريقة اللي ذكرتها فشوفوا هنا

٣. دوارة الأشرطة بالوان قوس القزح:

قصيت اشرطة متعددة بألوان مختلفة وربطتهم بحلقة خشبية. قمت بتعليق الحلقة من السقف

شو بميّز دوارة الاشرطة؟ الالوان الجذابة وملمس القماش على الوجه. بالاضافة ممكن استخدامها كدوارة بصرية او حسية حسب ارتفاعها عن الطفل

٤. دوارة الاجراس:

دوارة مميزة كتير وصوتها بعمل جو لذيذ بالبيت. عبارة عن 4 أجراس بألوان مختلفة وحلقة. لما الطفل بمسك الحلقة وبحركها الاجراس بتصدر أصوات جميلة. بتلاقوا بمتجرنا دوارة مشابهة كتير. بالاصل بتهدف كأجراس حديقة اللي بتصدر صوت لما الهواء بحركها بس طبعاً ممكن استخدامها كدوارة حسية أيضاً)

شو بميّز دوارة الاجراس؟ حركة الاجراس وصوتهم العالي الجذاب

بتلاقوا دوارة الاجراس بالمتجر هنا

جربتوا تسووهم؟ شاركونا بالصور

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site is protected by reCAPTCHA and the Google Privacy Policy and Terms of Service apply.